МАКЕДОНИЈА СКОКНА ЗА ЧЕТИРИ МЕСТА Две директни места во Европската лига
ЕХФ ја потврди распределбата за сезоната 2027/28, македонскиот шампион повторно ќе мора да бара вајлд-карта за Лигата на шампионите.
Европската ракометна федерација (ЕХФ) ја потврди распределбата на местата за машките клупски натпреварувања за сезоната 2027/28. Рангирањето е направено врз основа на резултатите на клубовите од националните федерации во последните три сезони, односно од 2023/24 до 2025/26. Шпанија напредуваше за една позиција и се најде на врвот на ранг-листата за Лигата на шампионите, додека Германија е највисоко рангирана во Европската лига. Во Европскиот куп на ЕХФ, лидер на листата е Босна и Херцеговина.
Лига на шампиони на ЕХФ 2027/28
Во сезоната 2026/27 беше воведен нов систем на натпреварување, според кој 24 екипи се поделени во шест групи со по четири тима. Бројот на федерации со загарантирано место во Лигата на шампионите останува непроменет. Десет национални федерации имаат по едно фиксно место: Шпанија, Германија, Данска, Франција, Унгарија, Полска, Португалија, Романија, Хрватска и Норвешка. Македонија се наоѓа на 11. место со коефициент 30,67, што претставува напредок од една позиција во однос на претходното рангирање. Сепак, македонскиот шампион и во сезоната 2027/28 ќе мора да аплицира за вајлд-карта доколку сака настап во најелитното европско клупско натпреварување.
Европска лига на ЕХФ 2027/28
Во Европската лига ќе има 36 екипи од 18 национални федерации, при што 32 тима ќе го сочинуваат главниот дел од натпреварувањето. Со оглед на тоа што 12 од 36-те екипи ќе добијат место во Лигата на шампионите, дополнителни осум места ќе бидат достапни за клубовите кои ќе бараат надградба на своето место. Германија и Франција, како прворангирани федерации, имаат по четири места, додека Португалија, Данска и Шведска имаат по три. Добра вест за македонскиот ракомет е што Македонија има две директни места во Европската лига. Дополнително, нашата земја бележи значителен напредок на ранг-листата, искачувајќи се за четири позиции – од 14. на 10. место, со коефициент 33,00.
ЕХФ Европски куп 2027/28
Во Европскиот куп на ЕХФ, Македонија ќе има две загарантирани места за свои клубови. За останатите македонски екипи кои ќе сакаат да бидат дел од ова европско натпреварување, ќе биде потребно да аплицираат за вајлд-карта. Рангирањето покажува позитивен тренд за македонскиот клупски ракомет, особено во Европската лига, каде што Македонија со напредокот до 10. место обезбеди две директни места за сезоната 2027/28.
