МАГИЧНО УТРО НА КОКИНО Министерот сведочеше на редок феномен стар 4.000 години

На денот на летната долгодневица, министерот за култура и туризам Зоран Љутков рано утринава го посети археолошкиот локалитет Кокино, каде што го проследи изгрејсонцето – впечатлив природен и астрономски феномен што со векови привлекува внимание од научници, истражувачи и посетители од земјата и светот.

Кокино, чија старост се проценува на околу 4.000 години, е едно од најзначајните археолошки и археоастрономски наоѓалишта во Македонија. Овој локалитет сведочи за извонредното познавање на движењето на Сонцето и небесните тела од страна на древните жители, кои преку внимателни набљудувања ги следеле природните циклуси и нивното влијание врз секојдневниот живот и духовната култура.

Од Министерството за култура и туризам информираат дека посетата е дел од активностите за афирмација и промоција на македонското културно наследство, како и од подготовките за одбележувањето на значајниот јубилеј – 25 години од откривањето на Кокино.

Јубилејот ќе биде одбележан во 2026 година со низа научни, културни и промотивни настани, насочени кон поголема меѓународна видливост на локалитетот и неговото значење.

„Министерството за култура и туризам останува посветено на зачувувањето, валоризацијата и промоцијата на културното наследство како темелна вредност на националниот идентитет и важен потенцијал за развој на културниот туризам“, соопштија од ресорното министерство.