ЛЕКАРИТЕ ВО СЕНКА – Вештачката интелигенција подобра од лекарите во итна помош
Истражување на Харвард покажува дека ВИ системи имаат повисока точност во итна тријажа од лекарите.
Лекарите од итната помош со години се симбол на брзина, прецизност и одлуки под притисок. Но, најново истражување од Харвард отвора важно прашање: до каде може да стигне вештачката интелигенција во клиничкото размислување?
Студијата објавена во списанието „Science“ покажува дека системи базирани на вештачка интелигенција ги надминуваат лекарите во итната тријажа и првичната проценка на пациентите при прием во болница.
Истражувачите утврдиле дека големите јазични модели постигнуваат подобри резултати во повеќе сегменти на клиничко размислување, особено кога треба брзо да се донесат одлуки врз основа на ограничени информации.
Во еден од експериментите биле анализирани 76 пациенти во итна помош во Бостон. И ВИ-системот и двајца лекари добиле идентични податоци и витални знаци, демографија и краток опис од медицинска сестра.
Резултатите покажале дека вештачката интелигенција дала точна или блиска дијагноза во 67% од случаите, додека лекарите биле точни во 50-55%.
Предноста на ВИ била најизразена во ситуации со малку информации и потреба од брза реакција. Кога имало повеќе податоци, точноста на ВИ се зголемила на 82%, а кај лекарите се движела меѓу 70 и 79% разлика која не била статистички значајна.
Дополнително, ВИ покажала подобри резултати и при предлагање долгорочни терапии, како избор на антибиотици и сложени медицински одлуки. Во тест со пет клинички случаи, ВИ постигнала 89% точност, додека лекарите со класични алатки 34%.
Сепак, авторите предупредуваат дека овие резултати не значат дека лекарите ќе станат излишни.
Истражувањето било ограничено на текстуални податоци и не ги опфатило важните човечки фактори и изгледот на пациентот, неговото однесување, говорот на телото и интуитивната проценка што лекарот ја добива при директен контакт.
Затоа, ВИ во овој контекст повеќе функционира како дополнителен советник, отколку како замена за лекар.
„Овие наоди не значат дека вештачката интелигенција ќе ги замени лекарите“, вели Арџун Манраи, еден од авторите на студијата. „Но, јасно е дека медицината влегува во период на голема технолошка трансформација.“
Неговиот колега Адам Родман смета дека во следната деценија ВИ ќе стане дел од нов модел на здравствена грижа и заедничка работа на пациентот, лекарот и интелигентниот систем.
Во пракса, ова веќе започнува. Во САД, речиси секој петти лекар користи ВИ при дијагностицирање. Во Велика Британија, 16% ја користат секојдневно, а уште 15% на неделно ниво.
Но, предизвиците остануваат. Најголемите грижи се можните грешки на системите и прашањето на одговорност и кој ќе сноси последици ако ВИ донесе погрешна препорака.
„Во моментов нема јасна рамка за одговорност“, предупредува Родман.
И покрај напредокот на технологијата, едно е сигурно и во клучни моменти, пациентите сè уште сакаат доверба, разбирање и водство од човек.