ЛАВРОВ ПРОГЛАСИ НОВ СВЕТСКИ ПОРЕДОК Мултиполарниот свет веќе е реалност, Западот ја губи доминацијата

Рускиот министер за надворешни работи Сергеј Лавров оцени дека создавањето мултиполарен свет веќе не е само политичка теорија, туку реалност што постепено го менува глобалниот поредок. Во интервју за каналот РБК, Лавров изјави дека светот се наоѓа во период на длабока трансформација, процес за кој, според него, ќе биде потребна цела епоха.

„Светот е во фаза на трансформација, на длабоки промени. Овие промени, по секоја веројатност, ќе траат цела епоха“, истакна шефот на руската дипломатија.

Тој додава дека можеби ниту сегашната генерација нема да ја дочека конечната форма на новиот светски поредок. Осврнувајќи се на периодот по распадот на Советскиот Сојуз, Лавров рече дека тогаш практично отворено била прогласена униполарноста, односно доминацијата на западниот политички и економски модел.

Тој го спомена американскиот политички теоретичар Френсис Фукујама и неговата позната теза за „крајот на историјата“, според која западниот либерален модел бил претставен како конечна и доминантна форма на политичко и економско уредување.

Според Лавров, во Русија во тој период постоеше голем ентузијазам поради напуштањето на комунистичкиот систем. Тој потсети и на периодот на владеењето на Борис Елцин, кога западни експерти активно учествувале во реформите, приватизацијата и трансформацијата на руската економија.

ПРЕПОРОДОТ НА РУСИЈА ГО ПРЕКИНА УНИПОЛАРНИОТ ПОРЕДОК

Лавров смета дека изборите во 2000 година ја покажале желбата на руското општество повторно да ја врати националната гордост, историскиот идентитет и своето место во светот. Како пресвртница во односите со Западот тој го посочи доаѓањето на Владимир Путин на власт и постепеното менување на руската надворешна политика.

Лавров потсети дека во првите години од владеењето на Путин постоеле обиди за воспоставување нови односи со САД. Путин во 2001 година ја посети Америка, а во наредната година Џорџ В. Буш допатува во Русија. Тогаш, како што наведува Лавров, била потпишана и декларација за нови стратешки односи меѓу двете земји.

Рускиот министер истакна и дека Путин порано предложил Русија да биде примена во НАТО, со аргумент дека повеќе не постоеле причините од времето на Студената војна.

„Ако повеќе не сме непријатели, ако нема Советски Сојуз, нема Варшавски пакт, нема идеолошки несогласувања, тогаш да нè примат во алијансата и да соработуваме“, го пренесе Лавров предлогот на Путин.

Според него, Западот, сепак, не бил подготвен Русија да ја третира како рамноправен партнер.

„Г8“ БИЛА САМО НЕПОТПОЛНА ИНТЕГРАЦИЈА

Лавров се осврна и на членството на Русија во Г8, оценувајќи дека и тоа не значело целосна интеграција во западниот систем на одлучување. Според него, Русија учествувала во политичките дискусии, но клучните економски и финансиски прашања и понатаму биле решавани во рамките на Г7.

Тој тврди дека Москва неретко била соочена со веќе донесени западни ставови за прашања како Иран и Северна Кореја, дури и кога тие одлуки оделе подалеку од постојните одлуки на Советот за безбедност на ОН.

ЛАВРОВ ГО ИЗДВОИ ГОВОРОТ НА ПУТИН ВО МИНХЕН

Како клучен момент во заладувањето на односите меѓу Русија и Западот, Лавров го издвои говорот на Владимир Путин на Минхенската безбедносна конференција во 2007 година. Тој оцени дека токму тогаш Русија јавно и недвосмислено покажала дека смета оти Западот не е подготвен да воспостави рамноправна соработка.

Според Лавров, Путин во Минхен се повикал на конкретни факти и документи, особено во врска со проширувањето на НАТО и односите меѓу Русија и западните земји.

„КИНА, ИНДИЈА И БРАЗИЛ ЈА МЕНУВААТ ГЛОБАЛНАТА РАМНОТЕЖА“

Лавров оцени дека денес веќе е очигледно дека светот се движи кон повеќеполарен модел. Како еден од главните показатели за тоа ја посочи Кина, која според него претставува најголема економска сила во светот мерено според паритетот на куповната моќ. Тој нагласи дека кинеската економија продолжува со импресивно темпо да се развива, додека Кина сè повеќе го зазема своето место во глобалната економија.

Покрај Кина, Лавров ги издвоји Индија и Бразил како држави кои забрзано ја зголемуваат својата економска и геополитичка тежина.

„Гиганти како Кина, Индија и Бразил креваат глава и многу брзо ја зајакнуваат својата економска позиција, заземајќи го своето место во светските економски прашања“, изјави Лавров.

АФРИКА СЕ ОДАЛЕЧУВА ОД „НЕОКОЛОНИЈАЛНИОТ МОДЕЛ“

Рускиот дипломат се осврна и на промените во Африка, оценувајќи дека континентот постепено се оддалечува од моделот во кој природните ресурси се извезувале, а најголемиот дел од додадената вредност се создавал надвор од Африка. Според Лавров, африканските држави сè повеќе бараат економска, а не само политичка независност.

Тој оцени дека африканските народи уживале во политичката деколонизација, но дека економската деколонизација, според него, до денес не била целосно завршена. Според Лавров, сите овие процеси на растот на Кина и Индија, зајакнувањето на Бразил и промените во Африка се дел од поширока трансформација која постепено ја менува глобалната распределба на моќта.