КОЈ МИСЛЕШЕ ДЕКА ЈУГОТ Е НАЈЗАДОЛЖЕН Оваа европска земја е број 1 со неверојатни 93,5% долг
Италија, Грција и Шпанија се далеку од врвот – најзадолжените домаќинства живеат во богатите земји на северот на Европа.
Според раширениот стереотип, жителите на Јужна Европа живеат над своите можности, додека северот важи за штедлив и финансиски дисциплиниран. Најновите податоци, сепак, покажуваат сосема поинаква слика. Најзадолжените домаќинства во Европската Унија не се во јужните земји, туку во богатите економии на северот и западот на континентот.
Според „Евростат“, долгот на домаќинствата во ЕУ во 2025 година изнесувал 49,4 отсто од БДП, а во еврозоната 50,7 отсто. И двете вредности се намалуваат од 2020 година, кога надминуваа 60 отсто.
На врвот на листата е Холандија, каде што долгот на домаќинствата достигнува 93,5 отсто од БДП. Високата задолженост главно е поврзана со станбените кредити и државните политики кои го поттикнуваат купувањето недвижности преку задолжување. Сепак, холандските домаќинства имаат и значајна пензиска и финансиска актива.
Втора е Данска со 84,1 отсто, а трета Шведска со 82,3 отсто. Следуваат Финска (62,9 отсто), Луксембург (60,5 отсто), Франција (59,5 отсто) и Белгија (56,4 отсто). На осмото место е Кипар со 54,2 отсто, додека Португалија има долг на домаќинствата од 53,9 отсто од БДП. Германија, најголемата европска економија, е на десеттото место со 49 отсто. Она што особено изненадува е позицијата на јужноевропските земји. Во Италија долгот на домаќинствата изнесува само 35,9 отсто од БДП, во Грција 38 отсто, а во Шпанија 42,9 отсто.
Така, иако владите на дел од јужноевропските држави се меѓу најзадолжените во Европа, нивните домаќинства се значително попретпазливи при задолжувањето. Економистите предупредуваат дека високата задолженост станува ризик кога домаќинствата тешко ги сервисираат своите кредити, особено во периоди на високи каматни стапки и пад на цените на недвижностите.
Податоците, сепак, покажуваат дека високата задолженост не значи автоматски и финансиска слабост. Во голем дел од северноевропските земји, долговите се поврзани со купување недвижности, додека домаќинствата истовремено поседуваат значајна имотна, финансиска и пензиска актива.
Заклучокот е јасен: кога станува збор за долгот на домаќинствата, европската слика е спротивна на познатиот стереотип – најзадолжени се токму богатите северни економии, додека југот на Европа е далеку под просекот.
