МАРКОВСКИ СО ОСТРИ КРИТИКИ ЗА ВЕШТАЧЕЊЕТО НА ОДБРАНАТА ЗА „ПУЛС“: „Стручна самодисквалификација“, сериозни недостатоци во анализата
Одбраната на првообвинетиот Дејан Јованов предложила 16 сведоци, меѓу кои неговата ќерка, претставници на Општина Кочани, МВР и противпожарната служба, како и лица вклучени во внатрешното уредување на дискотеката.
Професорот Горан Марковски од Градежниот факултет при УКИМ изнесе сериозни забелешки за вештачењето на Петре Русески, предложено од одбраната на Дејан Јованов, на продолжението на судењето за пожарот во дискотеката „Пулс“ во Кочани.
Марковски оцени дека вештачењето има селективен пристап, изоставува важни факти и навлегува во области за кои самиот Русески признал дека нема соодветна стручност. Особено ги проблематизираше анализите на градежните материјали, полиуретанскиот сунѓер, декоративниот лим, вентилацијата и градежните интервенции во објектот.
Според него, изградбата на челичните галерии, поставувањето греди и столбови и другите зафати не можат да се третираат само како внатрешно уредување, бидејќи влијаеле и врз конструктивниот систем на објектот.
„Стручна самодисквалификација е вештачењето на Русески. Тука нема стручни спротивставености, туку сериозни недостатоци“, изјави Марковски.
На рочиштето реагираше и Јавното обвинителство, кое изрази сомнеж дека начинот на изведување на дел од доказите и предложените вештачења може да доведе до одолговлекување на постапката. Обвинителите се спротивставија на усогласување на наодите на вештите лица.
Одбраната на првообвинетиот Дејан Јованов предложила 16 сведоци, меѓу кои неговата ќерка, претставници на Општина Кочани, МВР и противпожарната служба, како и лица вклучени во внатрешното уредување на дискотеката.
