КОЈ ГО КОЧИ ЗАКОНОТ ЗА ДОНАЦИИ 140 организации бараат итна реакција од Министерството за правда

Во Скопје денеска ќе се одржи јавна расправа за Законот за донации и спонзорства во јавните дејности, во рамки на проектот „Промени за одржливост“.

Во фокусот на расправата ќе биде иницијативата на 140 граѓански организации до Министерството за правда за продолжување и финализирање на процесот на измени на законот. Од граѓанскиот сектор оценуваат дека од завршувањето на овој процес во значителна мера ќе зависат идните услови за донирање, развојот на филантропијата и финансиската одржливост на граѓанските организации.

На јавната расправа се очекува учество на надлежни министри, претставници на релевантните институции, граѓански организации и деловниот сектор.

Учесниците ќе разговараат за причините поради кои процесот на законски измени е во застој, потребните промени во законската регулатива, како и за влијанието на новиот систем за е-фактура врз процесот на донирање.

Настанот се организира во рамки на проектот „Промени за одржливост“, кој го спроведува здружението „Конект“ во партнерство со Младинската асоцијација ИМКА Битола.

Проектот е поддржан од Владата на Швајцарија преку „Цивика мобилитас“.