ИЛИ ДОГОВОР ИЛИ ЕСКАЛАЦИЈА – Иран доби последна шанса од Трамп

Американскиот претседател Доналд Трамп го продолжи примирјето со Иран, додека тамошното раководство не се усогласи околу заеднички предлог и не продолжат мировните преговори.

Според објава на Трамп на неговата платформа, одлуката следува по проценките дека иранската влада е сериозно поделена, како и по барања од странски посредници. Тој наведе дека од САД е побарано да ги прекинат нападите врз Иран сè додека неговите политички и воени лидери не излезат со унифициран став.

Трамп додаде дека американската војска останува во состојба на подготвеност и дека ќе продолжи да ја следи ситуацијата, вклучително и мерките поврзани со Хормутскиот теснец.

Во меѓувреме, иранскиот преговарачки тим преку посредство на Пакистан го информирал Вашингтон дека нема да учествува на најавените разговори во Исламабад.

Според извештаи на американски медиуми, Трамп им дал на иранските власти рок од неколку дена да усогласат преговарачка позиција и да се вратат на масата за преговори, со можност за продолжување на примирјето за дополнителни три до пет дена.

Американски претставници тврдат дека во иранското раководство постои длабока поделба меѓу цивилните преговарачи и военото раководство, особено во рамки на Корпусот на Исламската револуционерна гарда. Поради тоа, новата рунда преговори во Пакистан била одложена.

Иако дел од советниците во Белата куќа наводно разгледувале можност за воени удари врз иранската енергетска инфраструктура, Трамп засега се одлучил да им даде предност на дипломатските напори. Сепак, американски извори предупредуваат дека воената опција останува на маса доколку не се постигне напредок во предвидениот рок.