ХОРОР ВО АВИОН НАД ГРЦИЈА Се скрши прозорец, патниците со голи раце спасуваа човек кој висел надвор од леталото

СРПСКИ државјанин (61) е повреден при драматичен инцидент за време на лет од аеродромот „Македонија“ во Солун кон Минхен, откако се скршил прозорец на авионот и дошло до декомпресија на кабината, објави грчкиот портал „Прототема“.

Авионот, кој полетал од Солун кон Минхен, по инцидентот безбедно се вратил на аеродромот во Солун. Според информациите, неколку патници пријавиле повреди.

Според очевидци, за време на спуштањето се откачил дел од моторот, кој удрил во прозорецот на кабината. Од ударот прозорецот се скршил, по што дошло до нагло намалување на притисокот во авионот.

Патник кој бил сведок на настанот изјавил дека луѓето во авионот се обидувале да го задржат мажот кој седел до оштетениот прозорец, стравувајќи дека може да биде извлечен од силата на воздухот.

Повредениот, 61-годишен српски државјанин, бил свесен, но во состојба на шок. Со возило на итната медицинска помош бил пренесен во болница во Солун, каде што му биле констатирани повреди на вратот и изгореници, за кои се претпоставува дека настанале од силното триење.

Според сведоштва за Радио Солун, мажот во еден момент бил извлечен речиси до рамената надвор од авионот, но бил спасен благодарение на безбедносниот појас и на патниците кои седеле покрај него и успеале да го повлечат назад во кабината.

Покрај него, уште четворица патници биле превентивно пренесени во болница. Тројца по укажаната лекарска помош биле пуштени на домашно лекување, додека еден останал на дополнителни медицински прегледи, пренесуваат српските медиуми.