ГРАНТОВИ ДО 615.000 ДЕНАРИ Кој сè може да добие пари за сопствен бизнис?

Владата денеска го презентираше и усвои Оперативниот план за вработување за 2026 година, документ со кој се предвидуваат мерки за зголемување на вработеноста, поддршка на пазарот на трудот и зајакнување на домашната економија.

Планот го претставија министерот за економија и труд Бесар Дурмиши и директорот на Агенцијата за вработување на Република Северна Македонија Аднан Ејуп, кои истакнаа дека целта е отворање нови работни места и подобрување на животниот стандард на граѓаните.

За реализација на предвидените активности се обезбедени над 40 милиони евра, а се очекува директна поддршка да добијат повеќе од 10.000 лица низ државата. Посебен акцент е ставен на младите, долгорочно невработените, лицата со попреченост, корисниците на социјална помош и жените.

Министерот Дурмиши нагласи дека клучната цел останува создавање реални можности за вработување и економско зајакнување на граѓаните, при што дел од мерките се насочени кон самовработување и стартување сопствен бизнис.

Во рамки на планот, младите ќе можат да аплицираат за грантови до 615.000 денари за започнување сопствен бизнис. Предвидена е и поддршка за повратници од странство кои сакаат да инвестираат во бизнис во земјата, како и за компании што отвораат нови работни места.

Дополнително, оперативниот план опфаќа практикантства, обуки и мерки за дефицитарни занимања, со цел полесно вклучување на невработените на пазарот на труд и унапредување на нивните вештини.