ГОРАТ 11 ПОЖАРИ НИЗ МАКЕДОНИЈА Огнот се шири на повеќе локации

До 13 часот денеска во земјава се регистрирани вкупно 17 пожари на отворен простор, од кои 11 се активни, три се ставени под контрола, а три се целосно изгаснати, информира Центарот за управување со кризи (ЦУК).

Активни пожари има во повеќе општини. Во Студеничани и Зелениково гори на потегот од селата Моране, Вртекица и Рамни Габер, со крак кон Палиград и над Вражале, каде е зафатена мешана шума. Пожар има и кај селото Цветово, по стариот пат кон Елово, каде гори ниска вегетација и шума.

Во Македонски Брод активни се пожарите во месноста Видуш, кај селата Драгов Дол и Локвица, со зафатена ниска вегетација, нискостеблеста шума и грмушки. Во Кичево гори високостеблеста букова шума кај селото Тајмиште, во месноста Дарда.

Пожари има и кај селото Ломница во Општина Врапчиште, селото Церово во Маврово и Ростуше, како и во селото Церово во Општина Желино. Активни се и пожарите кај селата Бонче, Мажунчиште и Коњари во Прилепско, како и кај селото Водоча во Струмица, каде гори стрниште.

Под контрола се пожарите кај селото Чаниште во Прилепско, со краци кон Крушевица, Лопатица, Дуње и Црна Река, потоа кај селото Никуштак во Липково и кај селото Бродец во Тетовско.

Целосно изгаснати се пожарите кај селото Белушино во Крушево, со крак кон Јакреново, на месноста Стари Лозја во Куманово и на депонијата во Делчево.