ЕУ СЕ ПОДГОТВУВА ЗА ДИРЕКТНА УЛОГА МЕЃУ КИЕВ И МОСКВА Дали ова е човекот што ќе ја претставува Европа?

Во последните денови сè почесто се шпекулира дека Европа би можела да добие место на преговарачката маса меѓу Украина и Русија, во период кога дипломатските напори предводени од САД се во застој.

Финскиот претседател Александар Стаб изјави на 24 мај дека би можел да ја претставува Европа во мировните преговори за Украина, доколку тоа му биде побарано. Како што пренесува „Киев Индепендент“, тој во интервју нагласил дека таквата улога не би ја одбил.

„Ако ве прашаат дали ќе ја претставувате Европа, тоа е веројатно нешто на кое не можете негативно да одговорите“, рече Стаб.

Идејата за поголема улога на Европа во мировниот процес сè повеќе се споменува во дипломатските кругови. Украинскиот министер за надворешни работи Андриј Сибиха за „Политико“ изјави дека Киев побарал поголема вклученост од Европа, особено во напорите за договор за прекин на огнот што би се однесувал и на воздушните напади.

„Веројатно ни е потребна нова улога за Европа во мировните напори“, истакна Сибиха на маргините на состанокот на министрите за надворешни работи на ЕУ во Брисел.

Во меѓувреме, рускиот претседател Владимир Путин на 9 мај предложи поранешниот германски канцелар Герхард Шредер да биде европски посредник во мировните преговори за завршување на војната во Украина. Но, германските власти наводно ја отфрлиле оваа идеја.

Шредер е познат по неговите блиски врски со Путин и руските официјални претставници. Според неименуван германски функционер за „Ројтерс“, предлогот на Москва не се смета за веродостоен, бидејќи Русија не ги променила своите услови за завршување на конфликтот.

Стаб во своето интервју истакна дека вистински мировни преговори можат да започнат само доколку Русија се обврзе на прекин на огнот.

Во меѓувреме, Русија продолжува со напади врз украинските градови со дронови и ракети. Украинскиот претседател Володимир Зеленски соопшти дека во масовен ноќен напад на 24 мај загинале четири лица, а речиси сто се повредени.

МЕРЦ СО НОВ ПЛАН ЗА УКРАИНА – Членство во ЕУ без право на глас