ДВАЈЦА ОСОМНИЧЕНИ ЗА ТЕШКА ТЕЛЕСНА ПОВРЕДА – Жртвата починала во болница

Јавен обвинител од Основното јавно обвинителство Скопје донесе Наредба за спроведување истражна постапка против две лица, на возраст од 44 и 46 години, поради основано сомнение за сторено кривично дело „Тешка телесна повреда“ од член 131 став 4 во врска со став 3 и став 1 од Кривичниот законик.

Инцидентот се случил на 10 септември, во вечерните часови, во паркот „Жена-борец“ во Скопје. Според обвинителството, осомничените и оштетениот претходно заедно консумирале алкохол. По вербална расправија, дојдено е до физичка пресметка во која двајцата осомничени со тупаници и клоци го нападнале оштетениот, нанесувајќи му тешки повреди по главата и телото.

Иако веднаш бил пренесен во болница, повредениот два дена подоцна им подлегнал на повредите.

Поради тежината на делото и опасноста од бегство или повторување на кривично дело, јавниот обвинител до судијата на претходна постапка од Основниот кривичен суд Скопје достави предлог за определување мерка притвор за двајцата осомничени.