ДРЖАВАТА КРАТИ 5,7 МИЛИЈАРДИ ДЕНАРИ ОД ИНВЕСТИЦИИ Што носи вториот ребаланс на Буџетот
Собранието ја продолжува расправата за вториот ребаланс на Буџетот за 2026 година, со кој приходите и расходите се намалуваат за по 5,3 милијарди денари
Собраниската Комисија за финансирање и буџет денеска треба да ја продолжи амандманската расправа за вториот ребаланс на Буџетот за 2026 година. За предложените измени се поднесени вкупно 124 амандмани, со кои се предвидува прераспределба на државните финансии.
Според предложениот ребаланс, буџетските приходи се намалуваат за околу 5,3 милијарди денари и се проектираат на 374,2 милијарди денари. Расходите се намалуваат за истиот износ, на 420,5 милијарди денари.
И покрај измените, буџетскиот дефицит останува непроменет и изнесува 46,3 милијарди денари, односно 4,1 процент од бруто-домашниот производ (БДП).
Една од најзначајните промени во ребалансот е намалувањето на капиталните инвестиции за речиси 5,7 милијарди денари. Причината е одложувањето на одредени инфраструктурни и други капитални проекти.
Истовремено, се предвидуваат дополнителни средства за социјално ранливите категории и здравствените услуги, а продолжува и поддршката за општините и локалната инфраструктура.
На приходната страна, значајни промени има кај акцизите. Планираните приходи од оваа ставка се намалуваат од 34,1 на 30,4 милијарди денари, главно поради намалувањето на акцизите за бензините и дизелот.
Мерката има цел да го ублажи влијанието на поскапувањето на горивата врз животниот стандард на граѓаните и работењето на компаниите. И покрај тоа што македонската економија оствари раст на БДП од 3,7 проценти во првата половина од годината, проекцијата за економски раст за целата 2026 година останува на 3,5 проценти.
Министерката за финансии Гордана Димитриеска-Кочоска оваа претпазливост ја образложи со неизвесноста во светската економија и продолжените конфликти на Блискиот Исток и во Украина.
Покрај измените во буџетските ставки, државата во текот на годината треба да подмири обврски во вкупен износ од 76,6 милијарди денари. Во сумата се вклучени отплатата на домашниот и надворешниот долг, како и обврските кон Развојната банка.
Од Министерството за финансии посочуваат дека средствата за сервисирање на овие обврски се обезбедени преку планираното домашно и странско задолжување. Амандманската расправа треба да ги разгледа предложените измени пред продолжувањето на собраниската постапка за усвојување на вториот ребаланс на Буџетот.
КРАЈ НА ТЕНДЕРИТЕ САМО СО НАЈНИСКА ЦЕНА Собранието воведе нови правила за јавните набавки
