ЧИСТКА ВО СИРИСКИОТ ВРВ – Се тресат фотелји, паѓаат министри и блиски луѓе на претседателот

Сирискиот претседател Ахмед ал-Шара во саботата спроведе делумна реконструкција на владата, при што разреши неколку високи функционери и министри, меѓу кои и член на неговото семејство, објавија државните медиуми.

Новите кадровски решенија, објавени од сириската новинска агенција САНА, го вклучуваат поранешниот гувернер на Хомс, Абдул Рахман Бадредин ал-Аам, кој го замени братот на Шара, Махер, на функцијата генерален секретар на претседателството.

Именувањето на Махер претходно предизвика критики од опозицијата, која ја обвини администрацијата за фаворизирање и непотизам наместо професионални критериуми.

Во рамки на реконструкцијата, Шара го назначи Халед Зарур за нов министер за информации, на местото на Хамза Мустафа, кој е преместен во Министерството за надворешни работи.

Басел Свеидан, кој раководи со комитет задолжен за преговори и договори со бизнис-елити поврзани со ерата на Асад, е именуван за министер за земјоделство, заменувајќи го Амџад Бадр. Зарур претходно бил декан на Факултетот за медиуми на Универзитетот во Дамаск.

Покрај овие промени, претседателот ал-Шара назначил и нови гувернери во неколку сириски провинции.