БРАНИТЕЛИТЕ СЕ ПОЖАЛИЈА ДЕКА ЗАКОНОТ ОД 2002 СЕ ИГНОРИРА Сиљановска им даде ветување ќе се заложи за законот

Претседателката Гордана Сиљановска-Давкова денеска во Народната канцеларија во Скопје оствари средба со претставници на Здружението на воени ветерани и воени инвалиди „Братство 2001“, меѓу кои беа Владо Томески, Петар Јанчевски, Мики Ристовски и Сашко Голубовски.

На средбата, претставниците на здружението укажаа дека Законот за посебните права на припадниците на безбедносните сили и нивните семејства од 2002 година се применува селективно од страна на институциите на централно и локално ниво. Според нив, тоа резултира со дискриминација при остварување на законски загарантираните права, особено во делот на вработувањето, напредувањето, бесплатните здравствени услуги и бесплатното високо образование за нивните деца.

Тие посочија и дека во пракса не се спроведуваат ниту правосилни судски пресуди донесени во нивна корист, и побараа измени и дополнувања на законот со цел негово прецизирање и подобрување на нивните права и бенефиции.

Претседателката Сиљановска-Давкова оцени дека нивните укажувања заслужуваат внимание од надлежните институции и нагласи потреба од еднаква примена на законот. Таа најави дека Кабинетот ќе ги информира надлежните органи за изнесените проблеми, со акцент на почитување и доследно спроведување на законот и судските одлуки.

Таа додаде дека придонесот на бранителите не смее да биде заборавен или занемарен, туку треба да биде соодветно почитуван и вреднуван.