БЕЛГРАД ДЕНЕС БЕШЕ ВО ЗНАКОТ НА МЛАДИЌ Погледнете како изгледаше неговото последно испраќање

Поранешниот командант на Војската на Република Српска, генерал Ратко Младиќ, денеска беше погребан на гробиштата Топчидер во Белград, покрај неговата ќерка Ана.

Погребната поворка пристигна на гробиштата околу 14:15 часот, откако претходно во црквата „Свети Лука“ во Видиковац беше одржана погребна служба со која чиноначалствуваше српскиот патријарх Порфириј.

Ковчегот со телото на Младиќ беше пренесен од припадници на српските вооружени сили и поставен на кочија, по што поворката се упати кон семејната гробница. Ковчегот беше покриен со знамињата на Србија и Република Српска.

Младиќ беше испратен со песната „Далеку, таму“ и со почесен плотун од припадници на српските вооружени сили.

На гробиштата беше одржана кратка погребна служба, а од Младиќ се простија неговиот долгогодишен соборец, генерал-потполковник Петар Шкрбиќ, и неговиот син Дарко.

Порфириј: За душата на Младиќ се молиме како и за сите жртви на војната

На погребната служба во црквата „Свети Лука“, патријархот Порфириј рече дека името на Младиќ ќе остане длабоко присутно во сеќавањето и молитвите на дел од српскиот православен народ.

Порфириј го опиша Младиќ како војник и командант кој, како што рече, во „тешко и трагично време“ презел голема одговорност и товар за својот народ.

Истовремено, патријархот нагласи дека животот на Младиќ не може да се одвои од „ужасната војна“, страдањата, загубените животи и длабоките трауми што ги остави конфликтот во Босна и Херцеговина.

„Молејќи се денес за душата на починатиот, за душата на воениот генерал, се молиме и за сите оние чии животи згаснаа во таа војна“, рече Порфириј.

Тој упати молитва за простување на сите гревови, волни и неволни, и порача дека конечниот суд за човекот му припаѓа на Бога.

Порфириј посочи дека човечките судови и човечката правда имаат свои ограничувања и дека ниту еден земен суд не може целосно да ја исцрпи вистината за еден човечки живот.

„Ниеден земен суд не е непогрешлив“, рече патријархот, додавајќи дека конечниот и целосно праведен суд му припаѓа на Бога.

На крајот од беседата, Порфириј се помоли за душата на Младиќ и за утеха на неговото семејство.

Голем број граѓани го испратија Младиќ

Уште од раните утрински часови, голем број граѓани се собираа пред црквата „Свети Лука“ во Видиковац, каде што беше изложен ковчегот со телото на Младиќ.

Граѓани пристигнаа и од различни делови на Србија, Република Српска и Црна Гора. Дел од нив носеа српски знамиња и фотографии од Младиќ, а пред храмот беше поставено и големо знаме на Србија.

По должината на улиците низ кои минуваше погребната поворка беа присутни голем број граѓани со цвеќиња и венци. Полицијата ги затвори улиците по трасата на поворката и го регулираше сообраќајот.

На погребот присуствуваа функционери од Србија и Република Српска

На погребот во црквата присуствуваа членови на семејството, негови соборци и претставници на институциите на Република Српска и Србија.

Меѓу присутните беа претседателот на Република Српска Синиша Каран, премиерот на РС Саво Миниќ, српската членка на Претседателството на БиХ Жељка Цвијановиќ, повеќе министри во Владата на РС, српскиот министер за правда Ненад Вујиќ, министерот за одбрана Братислав Гашиќ, како и градоначалникот на Бања Лука Драшко Станивуковиќ.

Присуствуваше и рускиот амбасадор во Србија Александар Боцан-Харченко, како и Данило Вучиќ, син на српскиот претседател Александар Вучиќ. Меѓу присутните беше и поранешниот грчки министер за национална одбрана Панос Каменос.

Претседателот на Србија Александар Вучиќ не присуствуваше на погребот поради официјалната посета на Србија на претседателот на Узбекистан, Шавкат Мирзијоев.

Младиќ почина во Хаг

Ратко Младиќ почина на 27 август во притвор во Хаг, каде што ја издржуваше доживотната казна затвор изречена од Механизмот за меѓународни кривични трибунали.

Неговите посмртни останки на 3 септември беа транспортирани од Хаг во Белград со авион на српската влада и беа пренесени во Военомедицинската академија, по барање на семејството за извршување обдукција.

Младиќ беше осуден на доживотен затвор за воени злосторства, меѓу кои и геноцид во Сребреница. Апелациската пресуда со која казната беше потврдена беше донесена во 2021 година, со издвоено несогласно мислење на судијката Приска Матимба Њамба.

За време на судскиот процес, Младиќ тврдеше дека ја бранел Република Српска и српскиот народ.

Младиќ во последните години од животот имаше сериозни здравствени проблеми, а неговото семејство и адвокатите повеќепати бараа да му биде овозможено лекување во Србија. Барањата беа одбиени од Механизмот.

Видеото е преземено од Танјуг