АВТОМОБИЛСКИ ГИГАНТИ ЌЕ ПРАВАТ РАКЕТИ И МУНИЦИЈА – Планот на Трамп потсетува на Втора светска војна
„Форд“ и „Џенерал моторс“ меѓу фирмите кои би можеле да влезат во одбранбениот сектор.
Администрацијата на претседателот Доналд Трамп разгледува можност автомобилски и други цивилни производители да добијат поголема улога во изработката на вооружување, потег што потсетува на моделот користен за време на Втората светска војна, објави „Волстрит џурнал“ (WSJ), повикувајќи се на извори запознаени со разговорите.
Според извештајот, високи претставници на американското Министерство за одбрана веќе разговарале со менаџери од повеќе големи компании, меѓу кои „Џенерал моторс“, „Форд мотор“, „ЏЕ Аероспејс“ и производителот на специјализирани возила и опрема „Ошкош“. Од Пентагон посочиле дека дел од овие фирми би можеле да помогнат како дополнување на постојните традиционални добавувачи во одбранбениот сектор.
Портпарол на Пентагон изјавил дека Министерството е насочено кон брзо проширување на одбранбено-индустриската база преку користење на комерцијални решенија и технологии, со цел да се обезбеди предност за американските сили.
Контекстот доаѓа по намалените залихи на оружје во САД, откако од почетокот на руската инвазија врз Украина во 2022 година и воените операции во Газа беа испорачани големи количества артилерија, муниција и противтенковски системи. Дополнително, Трамп овој месец побара значително зголемување на воениот буџет, што според неговите изјави е поврзано со пошироки безбедносни предизвици, вклучително и тензиите со Иран.