„ЧЕТ-ГПТ“ ПРИМА 2,5 МИЛИЈАРДИ ПРАШАЊА ДНЕВНО – Експлозивен раст на вештачката интелигенција

Компанијата за развој на вештачка интелигенција OpenAI објави импресивни податоци: нивната алатка „Чет-ГПТ“ дневно обработува 2,5 милијарди прашања од корисници ширум светот. Од овој огромен обем, дури 330 милиони дневни интеракции доаѓаат само од САД.

Извршниот директор на OpenAI, Сем Алтман, во декември 2024 година соопшти дека бројот на дневни прашања изнесувал околу една милијарда, што значи дека во период од помалку од осум месеци бројката се удвоила – знак за рапидно растечката популарност на алатките базирани на вештачка интелигенција.

За споредба, „Гугл“ извршува околу 14 милијарди пребарувања дневно, според сопствени и независни извори како „NP Digital“, „SparkToro“ и „Datos“. Тоа го прави „Чет-ГПТ“ сè позначаен играч во дигиталниот екосистем на информации и пребарување.

Истражувањата покажуваат дека повеќе од една четвртина од интернет-корисниците во САД веќе претпочитаат генеративни алатки како „Чет-ГПТ“ наместо традиционални пребарувачи. Во Велика Британија тој процент е околу 13%.

Причините за префрлување кон вакви алатки се бројни: полесна употреба, попрецизни и персонализирани одговори и перцепција за повисока ефикасност при наоѓање информации. Сето ова покажува дека генеративната вештачка интелигенција полека, но сигурно го менува начинот на кој го користиме интернетот.