БОЖИНОВСКА МЕЃУ ЕВРОПСКИТЕ ЖЕНИ ЛИДЕРИ Што ќе се решава во Брисел

Министерката за енергетика, рударство и минерални суровини Сања Божиновска доби покана да стане членка на Управувачкиот комитет на Мрежата на жени лидери во јавниот сектор за климатски прашања, нова европска иницијатива што ќе ги обединува носителките на високи јавни функции.

Божиновска утре во Брисел ќе присуствува на основачкиот собир на Мрежата и на првиот лидерски дијалог на платформата. Поканата ја упатила Силвана Кох-Мерин, претседателка и основачка на организацијата „Жени политички лидери“ (Women Political Leaders – WPL).

Од Министерството за енергетика информираат дека поканата го препознава придонесот на Божиновска во унапредувањето на енергетската транзиција, зајакнувањето на енергетската сигурност и диверзификацијата, развојот на обновливите извори на енергија и регионалната енергетска соработка.

Нејзиното искуство во креирањето јавни политики и работењето на меѓународните енергетски пазари е посочено како значаен придонес за идната работа на Управувачкиот комитет.

Комитетот ќе ја утврдува стратешката насока на Мрежата, ќе учествува во дефинирањето на приоритетите и годишната агенда и ќе придонесува во дијалозите на високо ниво.

„Поканата за ова тело отвора можност македонските искуства и приоритети да бидат вклучени уште при обликувањето на новата иницијатива“, наведуваат од Министерството.

Мрежата е основана од WPL под покровителство на принцезата Мари-Есмералда од Белгија, во партнерство со Мрежата на жени лидери за климата на Групацијата на Европската инвестициска банка.

Иницијативата има цел да ги поврзе носителите на јавни одлуки со експертизата, финансиските инструменти и инвестициските капацитети на приватниот сектор, за да се забрза реализацијата на климатските и инфраструктурните приоритети.

На основачкиот собир се најавени и принцезата Мари-Есмералда, европската комесарка за животна средина, отпорност на водните ресурси и конкурентна циркуларна економија, Џесика Росвал, како и министерката за туризам на Грција, Олга Кефалогијани, една од основачките ко-раководителки на Управувачкиот комитет.

Во фокусот на разговорите ќе бидат чистата електрична енергија, отпорноста на инфраструктурата и соработката меѓу јавниот и приватниот сектор. Учесниците ќе ја разгледуваат и улогата на дигиталните технологии и одговорната примена на вештачката интелигенција во поддршката на климатската транзиција.

Очекувањата се размената на искуства да придонесе за конкретни препораки, подобри политики и мобилизирање инвестиции во одржливи енергетски и инфраструктурни решенија.

Според концептот на иницијативата, основачката група треба да опфати околу 20 до 30 жени на високи политички и јавни функции, првенствено од Европската Унија, со можност за пошироко европско учество.

Од Министерството оценуваат дека вклучувањето на Македонија во оваа мрежа отвора можности за нови партнерства во енергетиката и непосредна размена на искуства со европските носители на одлуки.

Целта е да се придонесе кон развој на посигурен, поотпорен и поодржлив енергетски систем, како и кон поголемо учество на земјата во европските иницијативи за енергетска и климатска транзиција.