РЕКОНСТРУКЦИЈА ВО ВАРДАР Петмина заминуваат, пристигнува млад голман
Овие потези најавуваат нова ера за Вардар, кој очигледно влегува во фаза на темелна реконструкција со цел повторно враќање на врвот на македонскиот фудбал.
Најтрофејниот македонски фудбалски клуб Вардар го започна летниот преоден рок со сериозни кадровски промени. Клубот од Скопје потврди дека во следната сезона нема да смета на услугите на петмина фудбалери – Јасмин Мециновиќ, Николче Шаркоски, Александар Ѓурковски, Џибрил Дианеси и Михал Пинтер.
Промените не застануваат тука. „Црвено-црните“ објавија дека се во тек разговори за продолжување на договорите со двајцата играчи – голманот Методија Велковски и дефанзивецот Ненад Мишковски, додека искусниот чувар на мрежата Филип Гачевски е ставен на трансфер листа. Гачевски, кој беше дел од Вардар од 2015 година (со двегодишна пауза), ќе може да си замине без финансиска отштета.
Како дел од подмладувањето на тимот, Вардар потпиша четиригодишен договор со перспективниот голман Илир Зибери. Дваесетгодишниот чувар на мрежата доаѓа од редовите на Тетекс и ќе му конкурира на Давор Талески за стартната позиција меѓу стативите.
Овие потези најавуваат нова ера за Вардар, кој очигледно влегува во фаза на темелна реконструкција со цел повторно враќање на врвот на македонскиот фудбал.
