РАБОТА ОД ПОНЕДЕЛНИК ДО ЧЕТВРТОК Само ретки Белгијци ја имаат таа среќа

И покрај зголемениот интерес за алтернативни модели на работа, белгиските компании остануваат претпазливи кога станува збор за воведување четиридневна работна недела, покажуваат најновите податоци на агенцијата „Асерта Консалт“.

Според истражувањето, спроведено во пресрет на објавувањето на резултатите од Пилот-студијата на Федералното биро за планирање, само 2,85 отсто од компаниите во Белгија нудат можност за работа според режимот на четири работни дена неделно. Сепак, и покрај задржувањето на полната плата, овој модел бара продолжени работни часови во деновите кога се работи, што според експертите не е изводливо за сите сектори и профили на вработени.

„Моделот на четиридневна работна недела останува исклучок на белгискиот пазар на труд. Иако бројот на вработени кои го прифаќаат овој систем расте, нивниот удел сè уште е незначителен“, изјави правната експертка на „Асерта Консалт“, Лизбет Геталс.

Во моментов, само 0,8 проценти од вработените во Белгија работат според овој систем. Според Геталс, освен што подолгите смени се физички и психолошки исцрпувачки, скратената работна недела подразбира и губење на одредени придобивки што обично се поврзуваат со петтиот работен ден.

Истражувањето опфатило 224.000 вработени со полно работно време во околу 20.000 приватни белгиски компании. Податоците покажуваат дека моделот е поприсутен кај големите компании – 39,2 проценти од фирмите со повеќе од 500 вработени имаат барем еден работник кој работи четири дена во неделата. Во средни компании (со 200 до 500 вработени), тој процент изнесува 19,3.

„Не е изненадување што четиридневната работна недела се применува повеќе во поголемите компании. Тие имаат повеќе ресурси и поголема флексибилност да обезбедат непречено функционирање“, вели Геталс.

Пилот-студијата, која започна во ноември 2022 година како дел од „Новиот работнички договор“ на поранешната белгиска влада, има за цел да испита дали скратената работна недела може да донесе подобар баланс меѓу работата и приватниот живот, без притоа да се намалат продуктивноста и платите.

И покрај ваквите иницијативи, експертите заклучуваат дека, барем засега, четиридневната работна недела останува реткост во деловниот пејзаж на Белгија.