ЗЛАТОТО БЕЛЕЖИ ОСТАР ПАД НА СВЕТСКИТЕ БЕРЗИ Од рекордни 5.595 долари падна на 3.730 долари за унца, поевтинува и во Македонија

Падот на вредноста е уште поизразен на меѓународните пазари. Откако на почетокот на 2026 година достигна историски максимум од околу 5.595 долари за тројска унца, златото сега се тргува по цена од околу 3.730 долари, што е најниско ниво од септември 2025 година.

ЗЛАТОТО БЕЛЕЖИ ОСТАР ПАД НА СВЕТСКИТЕ БЕРЗИ Од рекордни 5.595 долари падна на 3.730 долари за унца, поевтинува и во Македонија

Цената на златото продолжува да паѓа на светските финансиски пазари, а надолниот тренд се одразува и врз цената на благородниот метал во Македонија. По рекордниот раст во изминатите две години, златото сега се соочува со значителна корекција, што ги менува очекувањата на инвеститорите и ја отвора дилемата дали неговата улога како сигурно засолниште во време на економска неизвесност е доведена во прашање.

Според најновите податоци, еден грам 24-каратно злато во Македонија денеска се продава по цена од 6.734,09 денари. Грам 22-каратно злато чини 6.172,91 денари, додека цената на 18-каратното злато изнесува 5.050,57 денари.

Цената на 24-каратното злато по тројска унца изнесува 209.430,15 денари, што претставува намалување од 586,82 денари, односно пад од 0,28 проценти во споредба со претходниот ден.

Падот на вредноста е уште поизразен на меѓународните пазари. Откако на почетокот на 2026 година достигна историски максимум од околу 5.595 долари за тројска унца, златото сега се тргува по цена од околу 3.730 долари, што е најниско ниво од септември 2025 година.

Особено внимание привлекува фактот што падот се случува во период кога и светските берзи на акции бележат значителни загуби. Од почетокот на октомври, кога американските берзански индекси достигнаа рекордни вредности, златото изгубило околу 10 проценти од својата цена.

Во изминатите неколку години златото беше меѓу најуспешните инвестиции на светските финансиски пазари. Од околу 2.000 долари за унца на почетокот на 2024 година, неговата вредност се зголеми речиси трикратно до јануари 2026 година.

Ваквиот раст беше поттикнат од зголемените набавки на злато од страна на централните банки, но и од засилениот интерес на инвеститорите кои вложуваа во овој метал преку берзански тргувани фондови (ETF).

Сепак, промената на глобалните макроекономски услови донесе пресврт. Растот на цените на енергенсите, засилените инфлаторни притисоци, повисоките приноси на американските државни обврзници и очекувањата за дополнително зголемување на каматните стапки од страна на Федералните резерви на САД (ФЕД) ја намалуваат привлечноста на златото како инвестициска опција.

Дополнителен фактор што врши притисок врз цената е зајакнувањето на американскиот долар, со оглед на тоа што златото на меѓународните пазари се тргува во американска валута.

За македонските граѓани, намалувањето на цената може да значи поповолни услови за купување златен накит и инвестициско злато. Од друга страна, оние кои веќе поседуваат злато се соочуваат со намалена пазарна вредност на своите заштеди, додека инвеститорите кои купувале на највисоките ценовни нивоа сега трпат значителни загуби.

Промените имаат значење и за државните финансии, бидејќи падот на меѓународната цена на златото ја намалува неговата книговодствена вредност во девизните резерви на Народната банка.

По силниот раст во претходниот период, актуелното движење на цената покажува дека и златото, и покрај традиционалната репутација на сигурно засолниште, не е имунo на пазарните турбуленции и инвестициските ризици.

CATEGORIES
Share This