СРБИЈА ЈА ЗАТВОРИ АЛТА БАНКА Редици во Битола, банката итно се огласи

Одлуката на Народната банка на Србија да ѝ ја одземе дозволата за работа на АЛТА банка од Белград предизвика загриженост и во Македонија, каде што српската банка неодамна ја презеде поранешната Стопанска банка Битола.

Според доставените информации, десетици граѓани претпладнево чекале пред АЛТА банка во Битола, со намера да ги подигнат своите пари, загрижени од веста дека банката во Србија повеќе нема дозвола за работа.

Од македонската банка, пак, уверуваат дека нема причина за паника, бидејќи станува збор за два посебни правни субјекта и дека АЛТА банка АД Битола продолжува со редовно работење.

Народната банка на Србија донесе одлука за одземање на дозволата за работа на АЛТА банка од Белград, образложувајќи дека нејзината финансиска состојба значително се влошила и дека постои ризик од дополнително нарушување на ликвидноста. Според официјалното соопштение, одлуката следува по претходно спроведени контролни активности и мерки насочени кон подобрување на ликвидноста на банката.

Сепак, контролите покажале дека финансиските проблеми продолжиле да се продлабочуваат, со што се појавила опасност од загрозување на интересите на штедачите. Српската централна банка наведува дека постапила согласно Законот за банки, со цел заштита на депозитите и зачувување на стабилноста на финансискиот систем.

За стечаен управник, со судска одлука, треба да биде назначена Агенцијата за осигурување депозити, а најавено е дека во рок од седум работни дена ќе започне исплатата на осигурените депозити согласно законските прописи.

Особено внимание предизвика и времето на објавување на одлуката. Соопштението на Народната банка на Србија било објавено во текот на ноќта, меѓу два и три часот по полноќ. Веќе претпладнето, според доставените информации, пред АЛТА банка во Битола се појавиле десетици граѓани кои сакале да ги повлечат своите средства.

Загриженоста е поврзана со фактот дека АЛТА банка од Белград е мнозински сопственик на македонската банка, која до неодамна работеше под името Стопанска банка Битола. Сепак, одземањето на дозволата на српската банка не значи автоматски и престанок на работењето на македонската банка, која е посебно правно лице и подлежи на домашната банкарска регулатива.

По информациите од Србија и загриженоста кај клиентите, АЛТА банка АД Битола излезе со официјално соопштение во кое нагласува дека нејзиното работење е стабилно.

„Ве информираме дека АЛТА банка АД Битола и АЛТА банка АД Белград се посебни правни субјекти.

АЛТА банка АД Битола работи согласно законската регулатива на Република Северна Македонија и е под супервизија на Народната банка. АЛТА банка АД Битола е ликвидна и продолжува со стабилно и непречено работење. Вашите средства ви се непречено достапни, а сите банкарски производи и услуги остануваат на располагање. Заштитата на интересите на нашите клиенти и одржувањето на вашата доверба остануваат наши највисоки приоритети“, се наведува во соопштението на банката.

АЛТА банка од Србија пред извесно време ја презеде Стопанска банка Битола, по што македонската банка го промени името во АЛТА банка АД Битола. Со ова преземање, српската банкарска групација го прошири своето присуство на македонскиот финансиски пазар. Но, најновите случувања во Белград отворија прашања кај дел од македонските штедачи за тоа дали проблемите на мнозинскиот сопственик би можеле да се одразат и врз работењето на банката во Битола.

Засега, од македонската АЛТА банка порачуваат дека таа е ликвидна, дека клиентите имаат непречен пристап до своите средства и дека сите банкарски услуги продолжуваат да функционираат. Клучно за натамошниот развој на ситуацијата ќе биде и следењето на состојбите од страна на македонската Народна банка, која е надлежна за супервизија на АЛТА банка АД Битола.