МАКЕДОНИЈА ДОБИ ЗЛАТЕН ОСКАР Тамара Котевска испиша историја со „Приказната за Силјан““

Македонската режисерка Тамара Котевска оствари историски успех на меѓународната документарна сцена, освојувајќи ја престижната награда „Зелен Оскар“ за најдобра режија и продукција на Wildscreen Panda Awards 2026 во Велика Британија. Признанието ѝ е доделено за документарниот филм „Приказната за Силјан“ (The Tale of Silyan), реализиран за National Geographic Documentary Films.

Со наградата Producer/Director Panda Award, Котевска станува првата добитничка на ова признание од Македонија и регионот, со што уште еднаш го потврдува меѓународниот потенцијал на македонската кинематографија.

Наградите „Панда“, познати како „Зелени Оскари“, се меѓу најзначајните признанија за авторите што преку документарниот филм ги истражуваат природата, животната средина и односот меѓу човекот и планетата. Меѓу претходните добитници се наоѓаат истакнати имиња како Сер Дејвид Атенборо и Пипа Ерлих, режисерката на оскаровскиот документарец „My Octopus Teacher“.

Во „Приказната за Силјан“, Котевска продолжува да ја развива темата што ја одбележа и нејзината претходна работа – сложената врска меѓу човекот и природата. Нејзиниот авторски пристап ги претвора личните приказни во универзални сведоштва за опстанокот, животната средина и светот што го делиме.

Овој успех се надоврзува на меѓународното признание за „Медена земја“, документарниот филм што освои светско внимание и доби две номинации за Оскар.

Успесите на „Приказната за Силјан“ не завршуваат со наградата Wildscreen. Филмот има и номинации за наградите „Еми“, британските документарни награди „Гриерсон“ и Jackson Wild Media Awards, со што продолжува да привлекува внимание на светската документарна сцена.

Со новото признание, Тамара Котевска испишува уште едно значајно поглавје за македонскиот филм и покажува дека приказните создадени во Македонија можат да допрат до меѓународната публика и да отворат важни прашања за човекот, природата и иднината на планетата.