ТРАМП ЈА ЗАСИЛУВА ВОЕНАТА МОЌ ВО ЕВРОПА Полска на чекор до постојана американска база
Полскиот претседател Карол Навроцки свика итен состанок на Советот за национална безбедност за 3 ноември, на кој зад затворени врати ќе се разговара за можноста за постојано американско воено присуство во земјата.
Полска повторно го става во фокусот прашањето за трајно распоредување американски воени сили на своја територија, во период на зголемени безбедносни предизвици во Европа.
Претседателот Карол Навроцки свика состанок на Советот за национална безбедност за 3 ноември, на кој една од главните теми ќе биде можноста за воспоставување постојана американска воена база во Полска.
Информацијата ја соопшти шефот на Бирото за национална безбедност, Бартош Гродецки, кој на социјалната мрежа X најави дека состанокот ќе се одржи зад затворени врати.
Покрај прашањето за американската воена база, на дневен ред ќе се најдат и други актуелни теми поврзани со националната безбедност на Полска.
Уште во септември, полскиот претседател Навроцки изјави дека земјата е блиску до реализација на плановите за трајно распоредување американски војници. Дополнителен сигнал за напредок во разговорите пристигна и од американскиот претседател Доналд Трамп, кој најави значително придвижување на преговорите за воспоставување постојана воена база, пренесува полската новинска агенција ПАП.
Доколку плановите се реализираат, тоа би претставувало значаен чекор во продлабочувањето на воената соработка меѓу Полска и Соединетите Американски Држави.
Можноста за постојана американска база во Полска има пошироко стратешко значење, особено поради положбата на земјата на источното крило на НАТО и нејзината близина до Русија и Белорусија. Сепак, конечна одлука за воспоставување на базата засега не е објавена.
Состанокот закажан за 3 ноември треба да покаже во која насока ќе се движат полските безбедносни приоритети и разговорите со Вашингтон.
