НОВИ ПРАВИЛА ВО ШЕНГЕН ЗОНАТА Македонските граѓани влегуваат во новата дигитална ера на гранична контрола

Македонските државјани наскоро ќе бидат опфатени со новиот Систем за влез/излез (EES) на ЕУ, со кој целосно се дигитализира контролата на надворешните граници на Шенген зоната. Системот ќе ја замени досегашната практика на ставање печати во пасошите, а целта е поефикасно следење на движењето на државјаните од трети земји, вклучително и оние кои патуваат без виза.

Што е EES?
EES е централизирана електронска база на податоци што автоматски ќе го евидентира времето, датумот и местото на влез и излез од ЕУ, како и времетраењето на престојот (максимум 90 дена во рок од 180 дена). Системот ќе испраќа автоматски предупредувања доколку некој го надмине дозволениот престој.

Кого опфаќа?
Системот важи за:

• Лица од трети земји со краткорочни визи
• Лица ослободени од виза, но кои не се државјани на ЕУ – како македонските граѓани

Биометриски податоци
При прв влез во ЕУ, патниците ќе бидат фотографирани и ќе им бидат земени отпечатоци од прсти. Овие податоци ќе се чуваат дигитално и ќе се користат за идни гранични проверки.

Постепено воведување
Воведувањето на EES ќе трае 6 месеци:

• Првите 2 месеци: без собирање биометриски податоци
• По 3 месеци: 50% од премините со биометрија
• По 6 месеци: целосна дигитална примена

Во овој период, ќе се користат и печати, но само привремено.

Овој систем ќе ја зголеми безбедноста, ќе спречи манипулации со престој и ќе понуди побрза и потранспарентна гранична контрола за сите патници.