БАЧЕВ СО НЕОБИЧЕН ПРЕДЛОГ Заев да биде сведок во случајот Ристов за заработката од бостан

Професорот и лидер на „Единствена Македонија“, Јанко Бачев, во објава на „Фејсбук“ направи паралела меѓу сведочењето на родителите на судијата Ѓоко Ристов за потеклото на парите поврзани со случајот и изјавите на поранешниот премиер Зоран Заев за неговата заработка од продажба на земјоделски производи на пазарот во Горњи Милановац, Србија.

Бачев се осврна на сведочењето на родителите на Ристов, кои, според неговата објава, објаснувале дека со години продавале земјоделски производи на пазарите, вклучително и во Горњи Милановац, каде што носеле бостан, дињи, пиперки, ореви, кајсии и други производи.

Во објавата тој наведува дека станува збор за готовина од околу еден милион евра чие потекло треба да биде докажано, вклучително и 350.000 евра пронајдени во ѕидот на семејната куќа. Станува збор за наводи поврзани со судски предмет, за кој конечниот збор треба да го има судот.

Бачев потсетува и на интервјуто што Зоран Заев во јуни 2021 година го дал за српскиот медиум „Курир“, во кое раскажал дека како млад земјоделец од Муртино продавал лубеници, домати и пиперки на пазарот во Горњи Милановац. Според тогашната изјава на Заев, од таа трговија дошол до својата прва голема заработувачка од 2,4 милиони тогашни германски марки.

„За помладите генерации да знаат точно е дека македонските земјоделци во поранешна Југославија ги продаваа своите производи на пазарот во Горњи Милановац“, пишува Бачев.

Тој нагласува дека не навлегува во правните аспекти на случајот со судијата Ристов, но отвора прашање за тоа колкава заработка можела да донесе трговијата со земјоделски производи на овој пазар.

Во продолжение на објавата, Бачев упатува критики кон Заев, а на крајот сугерира одбраната на Ристов да го предложи поранешниот премиер за сведок во врска со заработката од продажба на лубеници, домати, краставици и други земјоделски производи во Горњи Милановац.