ТРАНСПАРЕНТ ЗА МЛАДИЌ, ПОЛИТИЧКИ ПОРАКИ И ПИРОТЕХНИКА – УЕФА со нов казни за Србија

Фудбалскиот сојуз на Србија доби нови дисциплински казни од Европската фудбалска унија (УЕФА) поради инциденти на натпреварите од Лигата на нациите. Вкупната сума на казните за три натпревари достигна 129.500 евра, а српската репрезентација следниот домашен дуел против Германија ќе го игра пред ограничен број гледачи.

Најголемо внимание предизвика инцидентот на натпреварот меѓу Србија и Холандија во Белград, кога група деца на северната трибина на стадионот „Рајко Митиќ“ истакнаа транспарент посветен на Ратко Младиќ и го скандираа неговото име. Младиќ е правосилно осуден за геноцидот во Сребреница, злосторства против човештвото и други воени злосторства.

УЕФА ги разгледуваше инцидентите на натпреварите против Грција, одигран на 24 септември, и Холандија, на 27 септември во Белград. Дисциплинската постапка резултираше со повеќе парични казни и санкции што ќе влијаат врз присуството на навивачите на следните натпревари.

Поради расистичко и дискриминаторско однесување на навивачите, Фудбалскиот сојуз на Србија е казнет со 50.000 евра. Дополнително, изречена е забрана за присуство на публика на еден домашен натпревар, поради што дуелот со Германија ќе се игра со ограничувања.

Српскиот сојуз доби и казна од 22.500 евра поради пораки што УЕФА ги оценила како неприфатливи на спортските настани. За употреба на пиротехнички средства се изречени дополнителни 2.000 евра, а за влегување на гледачи на теренот 15.000 евра.

Санкции се изречени и поради гостувањето на Србија во Холандија, одиграно на 4 октомври во Ајндховен. Српскиот сојуз нема да може да продава билети за своите навивачи за следниот гостински натпревар на репрезентацијата. За инцидентите на тој дуел УЕФА изрече казна од 20.000 евра, а дополнителни 20.000 евра се однесуваат на истакнување политичка порака.

Казни и за Хрватска и Косово

УЕФА изрече дисциплински казни и за фудбалските федерации на Косово и Хрватска поради однесувањето на нивните навивачи на натпреварите од Лигата на нациите.

Фудбалската федерација на Косово е казнета со вкупно 35.000 евра. Од нив, 15.000 евра се однесуваат на истакнување несоодветни транспаренти, а 20.000 евра на расистичко и дискриминаторско однесување на навивачите.

Покрај паричната казна, Косово доби и условна забрана за продажба на билети за еден гостински натпревар во натпреварување под капата на УЕФА. Мерката е со пробен период од две години и ќе стапи на сила доколку се повтори сличен прекршок.

Хрватскиот фудбалски сојуз, пак, е казнет со 20.000 евра поради расистичко и дискриминаторско однесување на навивачите на натпреварот против Шпанија, одигран на 29 септември. Шпанската репрезентација на тој дуел победи со 4:1.

И Хрватска доби условна забрана за продажба на билети за следниот гостински натпревар на репрезентацијата во натпреварување на УЕФА. Како и во случајот со Косово, мерката ќе важи во период од две години, под услов да не се повтори сличен инцидент.

Одлуките на УЕФА покажуваат дека несоодветното однесување на трибините може да донесе сериозни финансиски последици за националните федерации, но и ограничувања што директно ги засегаат навивачите.