БРИТАНИЈА НА ШТРЕК Ризикот од војна е најголем во мојот живот, Путин е најголемата закана

Британскиот министер за одбрана, Вес Стритинг, изјави дека Русија и претседателот Владимир Путин претставуваат најголема закана за безбедноста на Велика Британија, предупредувајќи дека земјата се соочува со најголем ризик од војна во неговиот живот.

Стритинг оценува дека токму безбедносната ситуација е една од причините поради кои Лондон одлучил да направи, како што го опиша, „најголемото одржливо зголемување на трошоците за одбрана од крајот на Студената војна“.

Во интервју за The Sun, пред почетокот на конференцијата на Лабуристичката партија во Ливерпул, Стритинг рече дека Европа повторно се соочува со војна.

„Имаме војна на нашиот континент. Имаме руски претседател со империјалистички амбиции, кој постојано ја тестира британската одбрана, одбраната на НАТО и силата на нашите сојузи“, изјави тој.

Според него, ситуацијата создава „непријатна реалност“ за Велика Британија.

„Се соочуваме со поголем ризик од војна отколку во кој било момент во мојот живот“, додаде британскиот министер.

Стритинг рече дека Велика Британија во моментов ги има потребните капацитети за да ја гарантира својата безбедност, но предупреди дека тоа би можело да се промени доколку одбранбените способности останат на сегашното ниво во следните пет години. Токму затоа, според него, зголемувањето на воените капацитети е неопходно за одржување на безбедноста.

Британскиот министер нагласи дека поголемата воена моќ има за цел да го зајакне одвраќањето и да ја намали веројатноста од директен конфликт.

„Воената моќ го зајакнува одвраќањето, а силното одвраќање значително ја намалува можноста да се заврши во војна со Русија или со некој друг“, рече Стритинг.