МОЛ ИЗЛЕГУВА НА ЕВРОПСКИОТ ПАЗАР Подготвува еврообврзници од 500 милиони евра

Унгарската нафтена компанија МОЛ планира да издаде петгодишни еврообврзници во вкупна вредност од 500 милиони евра, како дел од својата среднорочна програма за издавање еврообврзници.

Компанијата денеска започна со средби со потенцијални инвеститори заинтересирани за обврзници со фиксна каматна стапка.

МОЛ на 10 септември го одобри ажурирањето на својата програма за еврообврзници, чија вкупна вредност изнесува две милијарди евра. Со тоа компанијата повторно доби пристап до меѓународниот пазар на еврообврзници, се наведува во документот доставен до Будимпештанската берза.

Според документот, планираната емисија ќе се спроведе исклучиво согласно правилата на Регулативата S, што значи дека обврзниците се наменети за меѓународни инвеститори надвор од американскиот пазар.

Издавањето на обврзниците е дел од финансиската стратегија на МОЛ за обезбедување средства преку меѓународните пазари на капитал.