ЛАВРОВ ДО САД Само кажете дали ѝ помагате на Украина – не е како да бараме многу

Москва очекува одговор од Вашингтон на прашањата поврзани со наводната американска вмешаност во подготовката и извршувањето на украинските напади врз цели длабоко на руска територија.

Рускиот министер за надворешни работи Сергеј Лавров на 14 август изјави дека Москва веќе испратила барање до американскиот Стејт департмент за појаснување на улогата на САД, особено во однос на размената на разузнавачки информации.

„Му испративме на Стејт департментот барање за појаснување, вклучувајќи ги прашањата поврзани со размена на разузнавачки податоци, како и фактот дека вмешаноста на САД во планирањето и извршувањето напади врз цивилни објекти во Руската Федерација е многу посериозна. Чекаме нивен одговор“, рече Лавров.

Според шефот на руската дипломатија, Москва не поставува ултиматуми, но очекува Вашингтон да се изјасни за прашањата што му биле доставени.

Лавров се осврна и на можноста за нова средба меѓу рускиот претседател Владимир Путин и американските претставници Стивен Виткоф и Џаред Кушнер. Тој посочи дека Путин не би се противел на таква средба, но клучно прашање е со какви конкретни иницијативи би дошле американските претставници во Москва.

Москва во последниот период продолжува да ги обвинува САД за подлабока вмешаност во украинските напади врз руска територија, додека Вашингтон не потврдил дека учествува во планирањето на такви напади.