ТУРИСТИЧКИ БУМ ИЛИ ПАД Над 113 илјади гости во јуни, но бројките за првата половина од годината загрижуваат
Странските туристи доминираат во јуни, а најмногу гости пристигнале од Турција. Сепак, вкупниот број туристи во првите шест месеци е намален за 0,5 отсто.
Во јуни годинава Македонија ја посетиле 113.436 туристи, кои оствариле вкупно 221.608 ноќевања, покажуваат најновите статистички податоци за туристичкиот сектор.
Странските гости доминираат во вкупната туристичка посетеност. Од регистрираните туристи во јуни, дури 77,2 отсто биле странци, додека домашните туристи учествувале со 22,8 отсто.
Слична е сликата и кога станува збор за ноќевањата. Странците реализирале 70,8 отсто од вкупниот број ноќевања, а домашните гости 29,2 отсто.
На врвот според бројот на странски туристи во јуни се гостите од Турција. Во земјава престојувале 24.570 турски туристи. На второ место се туристите од Србија со 8.522 гости, потоа следуваат Германија со 4.396 и Бугарија со 3.207 туристи.
Сепак, податоците за првите шест месеци од годинава покажуваат дека туристичкиот сектор бележи благо намалување на активноста.
Од јануари до јуни 2026 година, Македонија регистрирала 0,5 отсто помалку туристи во споредба со истиот период во 2025 година.
Најголем пад е забележан кај домашните гости, чиј број е намален за 3,1 отсто. Од друга страна, бројот на странските туристи бележи минимален раст од 0,3 отсто.
Намалување има и кај ноќевањата. Во првите шест месеци од 2026 година се реализирани 1,5 отсто помалку ноќевања во споредба со истиот период лани.
Кај домашните туристи падот на ноќевањата изнесува 3,3 отсто, додека кај странските гости е регистрирано намалување од 0,7 отсто.
Иако странските туристи продолжуваат да го носат најголемиот дел од туристичкиот промет, статистиката покажува дека вкупната туристичка активност во првата половина од годината е нешто послаба од ланската.
