25 ГОДИНИ ОД КАРПАЛАК Почит за десеттемина загинати прилепски резервисти
Делегации на Министерството за одбрана и Генералштабот ќе положат цвеќе на спомен-плочата кај местото на трагедијата.
Денеска се навршуваат 25 години од трагичниот настан кај Карпалак, во кој на 8 август 2001 година загинаа десет припадници на резервниот состав на Армијата, сите од прилепскиот регион.
По повод годишнината, делегации на Министерството за одбрана и Генералштабот на Армијата ќе им оддадат почит на загинатите со положување свежо цвеќе на спомен-плочата на местото каде што се случи трагедијата.
Одбележувањето ќе продолжи и во Прилеп, каде што цвеќе ќе биде положено пред спомен-обележјето посветено на македонските херои.
Заседа во која загинаа десетмина
Карпалак останува запаметен како најтрагичниот напад врз припадници на безбедносните сили во конфликтот од 2001 година.
На 8 август 2001 година, околу 9:30 часот, конвој од прилепската касарна, составен од транспортно возило, два автобуса, камион и комбе, се движел кон Тетово.
Кај месноста Карпалак конвојот бил пресретнат и нападнат од заседа. Врз возилата бил отворен силен оган од тешки митралези и рачни ракетни фрлачи.
Едно од транспортните возила било погодено со ракетен фрлач, при што животот го загубиле осум војници и двајца офицери, сите припадници на резервниот состав. Погоден бил и еден од автобусите.
Извлекувањето на преживеаните, меѓу кои имало 108 лица, траело повеќе часа.
Имињата на десеттемина засекогаш запишани
Во трагедијата кај Карпалак загинаа:
- Нане Наумоски од Прилеп
- Сашо Китаноски од Прилеп
- Бранко Секулоски од Прилеп
- Горан Миноски од Прилеп
- Марко Деспотоски од Новоселани
- Ердован Шабаноски од Прилеп
- Љубе Грујоски од Пашино Рувци
- Дарко Велјаноски од Ропотово
- Веби Рушитоски од Прилеп
- Пеце Секулоски од Бело Поле
По 25 години, споменот на десеттемина прилепски резервисти продолжува да се одбележува на местото каде што ги загубија животите.
