ДРОН УДРИ АВТОБУС ВО РУСИЈА 19 лица ранети, шестмина во тешка состојба
Според руските власти, во нападот биле оштетени и камион и патничко возило, а повредените ќе бидат префрлени на лекување во болниците во Белгород.
Најмалку 19 лица се повредени откако беспилотно летало, за кое руските власти тврдат дека било на украинските вооружени сили, удрило во автобус во градот Шебекино, во Белгородската област, соопшти вршителот на должноста гувернер на областа, Александар Шуваев.
Според неговите информации, 18 повредени лица биле итно префрлени во Централната регионална болница во Шебекино. Од нив, 15 се здобиле со шрапнелни повреди, додека кај тројца се констатирани акутни повреди.
Шестмина од повредените се во тешка состојба, наведе Шуваев во објава на платформата Max, пренесена од РИА Новости.
Тој додаде дека сите пациенти ќе бидат префрлени на лекување во болниците во Белгород, а доколку има потреба, и во федерални медицински установи. Во нападот, според руските власти, биле оштетени и автобусот, камион и патничко возило.
