БУРА ПРЕД КОНЦЕРТОТ НА КАРЛЕУША ВО СКОПЈЕ Се бара забрана, а Македонците со сосема поинаква порака

Само неколку недели по објавувањето на нејзините три нови песни, кои привлекуваат големо внимание кај публиката во Србија и регионот, балканската музичка ѕвезда Јелена Карлеуша повторно е во центарот на вниманието,  овојпат поради иницијатива поврзана со нејзиниот најавен концерт во Скопје.

Настапот, закажан за 17 октомври во арената „Јане Сандански“, стана предмет на онлајн петиција со која се бара негово откажување. Авторите на иницијативата како причина ги наведуваат тврдењата дека настапите на Карлеуша наводно содржат елементи со кои се промовира сатанизам и се навредуваат верските чувства, што предизвика реакции на социјалните мрежи.

Но, наместо очекуваниот бран на негодување, иницијативата предизвика и спротивен ефект. Под објавите на оваа тема се појавија бројни реакции од македонски фанови, кои ја поддржаа српската пејачка и порачаа дека е добредојдена во Скопје. Дел од нив дури повикаа на организирање на уште повеќе нејзини концерти, наместо на забрани.

Според реакциите на социјалните мрежи, значителен дел од јавноста смета дека концертот не треба да биде доведен во прашање. Карлеуша досега јавно не се огласила за иницијативата, иако темата предизвика интерес и кај српските медиуми.

Ова не е првпат пејачката да се соочи со вакви иницијативи. Во изминатите години слични петиции беа покренувани и во врска со нејзини настапи во Сараево, Крагуевац, Суботица, Кикинда и Сомбор. Некои од концертите беа откажани, додека други сепак се одржаа пред голем број посетители.

Останува неизвесно дали скопската петиција ќе има какво било влијание врз концертот најавен за октомври. Засега организаторите немаат објавено промени во програмата, а интересот за настапот, според достапните информации, продолжува да биде голем.