АХМЕТИ ОД СТРУГА Време е за единство, не за поделби

На средба со граѓани и поддржувачи во Струга, лидерот на Демократската унија за интеграција (ДУИ), Али Ахмети, испрати порака до македонските политичари, повикувајќи на национално единство и заедничка изградба на иднината. Тој нагласи дека без надминување на несогласувањата, не може да се постигне напредок и развој на нацијата.

Ахмети ги повика политичките чинители да ги остават настрана дневно-политичките разлики и да се посветат на интересите на граѓаните, истакнувајќи дека Охридскиот рамковен договор останува клучен за стабилноста и просперитетот на државата. Според него, земјата мора да се гради заеднички, со еднакви стандарди за сите нејзини граѓани.

Во своето обраќање, Ахмети го поздрави и потегот на министерот за здравство и лидер на едното крило на Алијанса за Албанците, Арбен Таравари, кој ја напушти коалицијата ВЛЕН поради несогласувања околу настапот на локалните избори. Тој ја оцени оваа одлука како исправна, посочувајќи на, како што рече, неправдите што ја враќаат државата децении наназад.

Во однос на критиките кон ДУИ, Ахмети ги отфрли како дневно-политичка пропаганда. Тој предложи да се спроведе целосен ветинг – проверка на сите политички партии, функционери и процесот на приватизација, започнувајќи од него самиот. Нагласи дека е време да се стави крај на обвинувањата без докази и дека само преку транспарентност и отчетност може да се врати довербата на граѓаните.

Со своето обраќање, Ахмети упати апел за политичка зрелост и заедничка визија во интерес на идните генерации.