НАД 3 МИЛИЈАРДИ ДЕНАРИ ЗА ЕЛЕКТРИЧНИ АВТОБУСИ Избран најповолниот понудувач
„ИКАРУС“ во заедничка понуда со ЕВН достави најниска понуда за 150 автобуси и 75 станици за полнење, а првите возила треба да пристигнат за шест месеци.
Четири компании доставиле понуди на јавниот повик за набавка на 150 електрични автобуси и 75 станици за полнење, информираат од Министерството за транспорт.
По спроведената евалуација, Комисијата за јавни набавки утврдила дека условите за учество на електронската аукција ги исполниле две компании „BMC Otomotiv Sanayi ve Ticaret Anonim Sirketi“ и „IKARUS Electric Zrt“ во заедничка понуда со ЕВН.
Понудите на „Xiamen Golden Dragon Bus Co, Ltd“ и „YES-EU DENMARK A/S YUTONG“, според евалуацијата, не ги исполнувале условите предвидени во јавниот повик.
На одржаната електронска аукција, најниска понуда доставила „IKARUS Electric Zrt“ во заедничка понуда со ЕВН, во вредност од 3.120.956.004 денари без ДДВ. Тоа претставува 19.796.924 денари без ДДВ по автобус и 2.018.899 денари без ДДВ по станица за полнење.
Комисијата предложила избор на најповолниот понудувач, по што е предвиден рок од десет дена за евентуални жалби.
По склучувањето на договорот, испораката треба да се реализира во три фази. Во првите шест месеци треба да бидат испорачани 30 електрични автобуси и 15 станици за полнење. Во рок од 12 месеци треба да следуваат уште 60 автобуси и 30 станици, а преостанатите 60 автобуси и 30 станици треба да бидат испорачани најдоцна во рок од 18 месеци од склучувањето на договорот.
ОДЛУКА ШТО ГО ТРЕСЕ ТРАНСПОРТОТ – Падна тендерот за 150 електрични автобуси
