ТЕНЗИЧНО ВО АВИОН Одбил да седи покрај жена, повикал на Шеријат, па ја нападнал стјуардесата
29-годишен германски државјанин од турско потекло предизвикал инцидент на летот кон Дизелдорф, а по слетувањето бил уапсен од полицијата.
Лет од Турција кон германскиот град Дизелдорф завршил со интервенција на федералната полиција, откако 29-годишен патник предизвикал инцидент во авионот на „Туркиш ерлајнс“. Според информациите објавени во германските медиуми, патникот, германски државјанин од турско потекло, веднаш по влегувањето во авионот одбил да седне на доделеното место бидејќи покрај него седела жена.
Ситуацијата набрзо ескалирала, а мажот започнал гласно да се повикува на верски правила, тврдејќи дека не сака да седи во близина на непозната жена. Кабинскиот персонал се обидел да го смири и да го реши проблемот, но според полицискиот извештај, тој станал агресивен и ја нападнал стјуардесата. По слетувањето во Дизелдорф, на пистата го чекале припадници на германската полиција кои веднаш го привеле патникот. Според германскиот весник „Билд“, тој ја признал вината за нападот.
Инцидентот повторно го отвори прашањето за зголемениот број случаи на агресивно однесување кон авионскиот персонал. Во последниот период се регистрирани повеќе напади врз членови на кабински екипажи, поради што авиокомпаниите и надлежните служби сè почесто предупредуваат на последиците од насилното однесување во авионите.
