ИРАН ПОВТОРНО ГО СТЕГНА ОБРАЧОТ Хормускиот теснец веќе не е слободен
ИРГЦ предупреди дека бродовите ќе можат да минуваат само по рути одобрени од иранските власти, додека светот стравува од нови потреси во глобалниот транспорт на енергенси.
Морнарицата на Исламската револуционерна гарда (ИРГЦ) денес испрати предупредување дека безбедното пловење низ Хормускиот теснец ќе биде дозволено единствено преку коридори одредени од иранските власти.
Од ИРГЦ порачаа дека сите движења надвор од официјално утврдените рути се сметаат за „забранети и опасни“, а бродовите што нема да ги почитуваат правилата ќе бидат подложни на надзор и можни реакции.
Според соопштението објавено од иранскиот медиум „Press TV“, алтернативните пловни правци не се прифатливи за Техеран, а сите бродови што транзитираат низ стратешкиот воден пат ќе мора да имаат задолжителна координација со морнарицата на ИРГЦ.
Ова предупредување следува по неодамнешната изјава на претседателот на иранскиот парламент, Мохамед Бакер Калибаф, кој порача дека контролата врз Хормускиот теснец нема да се врати во состојбата пред 28 февруари. Според Техеран, токму тогаш САД и Израел започнале нови воени активности против Иран.
Иран претходно најави ограничувања за поминување на бродови од земји што ги смета за непријателски настроени, како одговор на американските мерки насочени кон ирански пристаништа и пловни објекти.
Иако Техеран тврди дека со Вашингтон бил постигнат меморандум за намалување на тензиите и олеснување на морскиот сообраќај, иранските власти нагласуваат дека преминот низ теснецот и понатаму ќе зависи од претходна координација и контрола од нивна страна.
Според договорот, Иран би требало да обезбеди безбеден премин за комерцијалните бродови меѓу Персискиот Залив и Оманскиот Залив во период од 60 дена, без дополнителни такси.
Хормускиот теснец е еден од најважните поморски премини во светот, бидејќи низ него се одвива значаен дел од глобалниот транспорт на нафта и течен природен гас.
