ДАЛИ СЕ РАСПАЃА СОЈУЗОТ Нема средба Трамп-Зеленски во Франција

Американскиот претседател Доналд Трамп нема закажано официјална билатерална средба со украинскиот претседател Владимир Зеленски на претстојниот самит на Г7 во Франција, објави „Блумберг“, повикувајќи се на високи претставници на американската администрација.

Откако се врати на функцијата во јануари 2025 година, Трамп одржа неколку формални и неформални средби со Зеленски во обид да се поттикне завршување на конфликтот меѓу Русија и Украина. Според наводи, Зеленски настојувал на овие состаноци да се финализираат претходно договорени планови за економска обнова на Украина по завршување на војната, како и за добивање безбедносни гаранции. Сепак, досегашните контакти меѓу двајцата лидери не резултирале со конкретен договор.

За време на самитот, Трамп ќе одржи билатерални средби со лидерите на Франција, Катар, Обединетите Арапски Емирати, Египет и Индија, соопштија официјални лица запознаени со планот. Настанот ќе се одржи од понеделник до среда во градот Евиан-ле-Бен.

Според еден функционер, Зеленски ќе учествува на работна сесија со лидерите на Г7. Претходно оваа недела, западни медиуми, повикувајќи се на извори од американската администрација, објавија дека постои можност Трамп и Зеленски да се сретнат на маргините на самитот.

Во рамки на своите напори за завршување на конфликтот во Украина, Трамп се сретна со Зеленски во Овалната соба во февруари 2025 година. Разговорите тогаш прераснаа во тензична размена на ставови, откако Зеленски го критикуваше пристапот на Трамп кон конфликтот. Од американската страна беа упатени обвинувања дека Зеленски не покажува доволно почит кон САД како главен поддржувач на Украина и дека со својот став го попречува мировниот процес.

Оттогаш, односите меѓу двајцата лидери се подобрија и тие се сретна во неколку наврати.

Зеленски и понатаму повикува на директна средба со рускиот претседател Владимир Путин. Сепак, тој ја отфрла можноста за патување во Москва и ја одбива идејата за повлекување на украинските сили од регионот Донбас, што Москва го поставува како услов за прекин на огнот.

Рускиот претседател Владимир Путин, говорејќи на Меѓународниот економски форум во Санкт Петербург, изјави дека Русија останува посветена на мировно решение засновано на претходни договори и компромиси. Тој додаде дека клучна пречка останува прифаќањето на условите од страна на Киев, вклучувајќи повлекување од Донбас, неутрален статус во однос на НАТО и демилитаризација.