ЧЕТИРИЧЛЕНО СЕМЕЈСТВО МОЖЕ ДА ДОБИЕ 8.400 ДЕНАРИ Следува исплатата од „МојДДВ“
Повратот се однесува на скенираните фискални сметки во јули, август и септември. Еден корисник може да добие до 2.100 денари, а четиричлено семејство до 8.400 денари.
Граѓаните кои скенирале фискални сметки преку апликацијата „МојДДВ“ во јули, август и септември можат да очекуваат исплата на повратот на ДДВ до 30 ноември. Максималниот износ што може да го добие еден корисник изнесува 2.100 денари, но пред исплатата треба да проверат дали имаат внесено точни банкарски податоци.
Управата за јавни приходи (УЈП) сè уште нема соопштено конкретен датум за почетокот на исплатата за третото тримесечје од 2026 година, но средствата се очекува да бидат исплатени најдоцна до крајот на ноември.
Висината на повратот зависи од прифатените фискални сметки и од износот на пресметаниот ДДВ. За македонски производи и услуги на граѓаните им се враќаат 20 проценти од пресметаниот ДДВ, додека за останатите производи и услуги повратот изнесува 10 проценти од данокот.
Максималниот поврат за едно лице е 2.100 денари за тримесечјето. Тоа значи дека четиричлено семејство, доколку сите членови ги исполнуваат условите и го достигнат максималниот износ, може заедно да добие до 8.400 денари.
Пред да започне исплатата, корисниците треба да проверат дали во апликацијата „МојДДВ“ имаат внесено точна и активна трансакциска сметка. Ова е особено важно за граѓаните кои во меѓувреме ја смениле банката или ја затвориле претходната сметка.
Неточните или неактуелните банкарски податоци може да предизвикаат проблеми и одложување на исплатата, па затоа е препорачливо проверката да се направи навреме.
