ИРАН ТВРДИ – Четири американски брода се онеспособени

Иранските медиуми објавија дека во Ормутскиот теснец наводно биле нападнати американски разорувачи со ракети и беспилотни летала, повикувајќи се на извори блиски до иранските власти. Според тврдењата на агенцијата „Тасним“, нападот бил изведен од иранската морнарица, а американските бродови биле прераспоредени кон Оманскиот Залив.

Иранскиот функционер Мехди Мохамади, советник на претседателот на парламентот, во аудио порака на Телеграм изјави дека заедничка операција на морнарицата на ИРГЦ и иранската армија довела до, како што рече, „тежок пораз“ за американските сили во Персискиот Залив.

Тој тврди дека САД започнале операција наречена „Проект Слобода“ со цел повторно отворање на Ормутскиот теснец, но дека акцијата била запрена по жесток отпор од иранските сили.

Според неговите наводи, четири американски бродови биле онеспособени, а два наводно се насукале во близина на островот Абу Муса. Исто така, Мохамади изјави дека американскиот претседател Доналд Трамп наводно бил принуден да ја прекине операцијата во раните утрински часови.

Засега нема официјална потврда од американските власти или независни меѓународни извори за наводниот напад и за штетите што ги тврди Иран. Информациите доаѓаат исклучиво од ирански медиуми и функционери, а дел од изнесените тврдења не можат независно да се проверат.