ИЗЛОЖБА ВО МКЦ ШТО МЕНУВА СЕ – Како Европа ја обликуваше македонската уметност

Вечерва, 6 мај (среда), со почеток во 20:00 часот, во галеријата на Младинскиот културен центар (МКЦ) во Скопје ќе биде свечено отворена изложбата „Старите мајстори и македонската модерна“ значаен истражувачки проект кој го разгледува односот меѓу европското уметничко наследство и развојот на модерната уметност во Македонија.

Автор на проектот е проф. Кирил Пенушлиски, а изложбата нуди продлабочено истражување на влијанијата од делата на старите европски мајстори врз македонските модерни уметници. Тие влијанија не се прикажани само како техничка инспирација, туку и како поттик за критичко размислување, интерпретација и создавање нови визуелни изрази.

Преку внимателно одбрани уметнички дела, изложбата го следи процесот во кој македонските автори, во специфични историски и културни околности, воспоставуваат индиректен, но суштински дијалог со европската ликовна традиција. Преку изучување, копирање, адаптација и креативна трансформација на класичните модели, тие создаваат сопствени автентични изрази кои ја обликуваат македонската модерна уметност.

Посетителите ќе можат да го проследат овој развоен пат низ дела на значајни македонски уметници, меѓу кои Личеноски, Лазески, Корубин, Чемерски, Пенушлиски и други, чии творби го одразуваат динамичниот однос меѓу традицијата и модернизмот.

Изложбата отвора и пошироки прашања за улогата на културното наследство како жив и активен елемент во современото уметничко создавање, позиционирајќи ја македонската модерна уметност во поширокиот европски контекст.

Проектот е поддржан од Министерството за култура на Република Македонија и ќе биде отворен за посетители до 20 мај.