ШАКИРА ПРЕД 2 МИЛИОНИ ЛУЃЕ НА КОПАКАБАНА – Настап за историја
Концертот траеше нешто повеќе од два часа и вклучи нејзини најголеми хитови.
Светски познатата поп-ѕвезда Шакира одржа бесплатен концерт синоќа на иконската плажа Копакабана во Рио де Жанеиро, настан кој привлече огромна публика и предизвика големо внимание во светот.
Пејачката изјави дека овој настап ќе остане засекогаш во нејзиното сеќавање, нагласувајќи дека станува збор за еден од најголемите концерти во нејзината кариера. Според проценките, шоуто го следеле околу два милиони луѓе.
Во текот на повеќе од два часа, Шакира изведе низа од своите најпознати песни, меѓу кои „Waka Waka“, „Whenever, Wherever“, „Hips Don’t Lie“, „La Tortura“ и „She Wolf“, на воодушевување на публиката.
Концертот беше дел од музичката иницијатива „Todo Mundo no Rio“ („Сите во Рио“), чија цел е да донесе големи меѓународни музички имиња на бразилската крајбрежна сцена.
Во најавата за настанот, Шакира ја истакна својата посебна емоционална врска со Бразил, опишувајќи ја Копакабана како „сон“ и „магично место“, па дури и како „олтар на планетата Земја“.
За потребите на спектаклот беше изградена проширена сцена од околу 1.500 квадратни метри, што ја направи една од најголемите поставки на оваа локација досега.
Подготовките за концертот, сепак, беа засенети од трагичен инцидент при монтажа на сцената, кога работник загина откако останал заглавен меѓу две подвижни платформи.