АТЕНТАТ ВО СТАНБЕНА ЗГРАДА – Убиен руски офицер, исчезнува трагата на генералот

Воен инцидент во рускиот Хабаровски крај наводно бил насочен кон генерал-мајор Азатбек Омурбеков, кој според украински и медиумски извори е поврзуван со настаните во Буча за време на почетокот на војната во Украина.

Според информациите објавени од InformNapalm и пренесени од украинскиот United24 Media, експлозијата се случила во населбата Књажје-Волконское-1. Наводно, експлозивната направа била поставена во поштенско сандаче во скалишниот простор на станбена зграда.

Во инцидентот животот го загубил потполковник Кузменко, командант на баталјон за обука за комуникации, а неколку лица се повредени. Засега нема потврдени информации за состојбата на генерал Омурбеков. Руските власти, според некои извори, сè уште не го коментираат целосно случајот.

Омурбеков бил командант на 64-та моторизирана бригада во 2022 година и се поврзува со настаните за време на руската окупација на Буча. Поради тоа бил идентификуван уште во април 2022 година и ставен под санкции од повеќе држави. Подоцна бил одликуван со титулата „Херој на Русија“ од претседателот Владимир Путин.

Овој настан се надоврзува на серија напади врз високи руски воени функционери. Во последен период биле пријавени и други слични случаи, вклучувајќи експлозија на автомобил-бомба во Москва, во која загинал висок офицер, како и уште еден напад во московскиот регион Балашиха, каде бил убиен друг генерал-потполковник.