ЛУЃЕ КАКО СТАТУИ, МУЗИКА И БОЈА – Центарот на Скопје изгледаше како филм

Во Скопје, на улица „Македонија“, се одржа настанот „Центарски улици 4,  Светски ден на уметноста“, кој го претвори централното градско подрачје во отворена сцена исполнета со уметност и перформанси.

Организаторите информираат дека улицата била трансформирана во жив уметнички простор со учество на улични „живо статуи“ во продукција на Театроск, како и ликовни уметници студенти од Универзитетот АУЕ-ФОН, кои создавале дела во живо пред публиката. Дел од програмата биле и улични перформанси, DJ сетови и музички настапи.

Од здружението „Театроск“ посочуваат дека целта на настанот е да се отвори простор за младите уметници, да им се овозможи директна презентација пред јавноста, како и да се поттикне развојот на современата уметност преку активирање на јавниот простор.

Настанот, организиран од Здружението на граѓани „Театроск“ од Скопје, е поддржан од Општина Центар и е дел од нејзината Програма за култура за 2026 година, а воедно се одбележува и Светскиот ден на уметноста и 50-годишнината од постоењето на Општина Центар.

„Центарски улици“ годинава се одржаа по четврти пат, повторно претворајќи го центарот на Скопје во сцена на отворено исполнета со уметничка енергија и публика.