ДОБРА ВЕСТ ИЛИ ЛАЖНА НАДЕЖ – Цената паѓа, но кризата со нафтата не е готова

Иако цените на нафтата се спуштија под 100 долари за барел, суровата нафта сè уште е околу 36% поскапа во споредба со периодот пред почетокот на конфликтот меѓу САД и Израел со Иран, објавува Би-би-си, повикувајќи се на податоци од Меѓународната агенција за енергија (ИЕА).

Според „Гардијан“, и малото намалување на цената се смета за позитивен сигнал на пазарите. Иако падот е помал од еден процент, секоја цена под прагот од 100 долари во моментов се оценува како добра вест.

Цената на барел „брент“ нафтата сега изнесува околу 98,50 долари. Таа вчера накратко се искачи на 103,65 долари по веста за наводна блокада на Ормутскиот теснец, но подоцна во текот на ноќта падна на 96,60 долари.

Овој пад се поврзува со зголемените очекувања за можни мировни преговори меѓу САД и Иран, како и со привременото двонеделно примирје кое моментално е во сила.

Сепак, цените остануваат значително повисоки од нивото пред ескалацијата на кризата, што веќе има ефект врз зголемувањето на трошоците за живот.

Пред почетокот на конфликтот, барел „брент“ се движеше околу 72 долари, и покрај претходните тензии.

Во меѓувреме, 32-те членки на ИЕА минатиот месец се согласија да пуштат 400 милиони барели од стратешките резерви за да се стабилизира снабдувањето, а од организацијата најавуваат дека се подготвени за дополнителни интервенции доколку биде потребно.

Извршниот директор на ИЕА, Фатих Бирол, оценува дека актуелните цени не ја одразуваат целосната сериозност на ситуацијата на Блискиот Исток и предупредува дека април би можел да биде потежок од март во однос на енергетските пазари.