ГОРДОСТА НА МАКЕДОНИЈА – Новата раса куче што го освои светот
Македонскиот Караман официјално влезе во светската кинолошка мапа.
Македонското овчарско куче „Караман“ е официјално вклучено во листата на 378 светски признати раси на кучиња во рамки на Меѓународната кинолошка федерација, што се смета за значаен чекор во афирмацијата на македонското кинолошко наследство.
Претседателот на Кинолошкиот клуб „Македонско овчарско куче – Караман“, Илија Ико Каров, истакнува дека процесот на признавање претставувал повеќедецениска работа исполнета со истрајност, визија и посветеност.
Според Каров, развојот и афирмацијата на расата траеле повеќе од 20 години. Тој нагласува дека ова не е успех на поединец, туку на целиот тим и државата, која добива уште еден симбол на своето природно и културно наследство.
Расата потекнува од автохтоните планински кучиња кои со векови ги чувале стадата во македонските планини. Со комбинирање на природна селекција и научен пристап, бил оформен денешниот Караман.
Караманот се опишува како исклучително лојално и природно куче, со изразени инстинкти за чување и заштита. Според одгледувачите, овие кучиња се пријателски настроени кон децата и можат да бидат добри миленици, но најдобро функционираат во услови со двор и слободен простор.
Еден од поголемите предизвици за иднината на расата е намалувањето на сточарството и миграцијата од руралните кон урбаните средини, што го отежнува пронаоѓањето на чистокрвни единки.
Во процесот на признавање, значајна улога имале и научните истражувања на Ветеринарниот факултет во Скопје. Асистентот д-р Димитар Божиновски спровел анализи кои покажале јасни морфолошки и генетски разлики помеѓу Караманот и шарпланинецот.
Со помош на компјутерска томографија и мерења на черепната структура, утврдени се разлики во неврокранијалниот и ендокранијалниот волумен. Дополнително, генетските анализи со микросателити покажале значајни разлики во ДНК, што според истражувањето укажува дека станува збор за две одделни раси.
Проектот за создавање и афирмација на расата започнал кон крајот на 1990-тите години, кога биле собрани првите примероци од автохтоните планински кучиња. Во 2004 година бил формиран Кинолошкиот клуб „Македонско овчарско куче – Караман“, а расата за првпат била официјално претставена во 2010 година.
Во 2011 година Караманот добил и поштенска марка, како симболично признание за неговото културно и природно значење.
Караманот денес се претставува како резултат на долгорочна работа, научен пристап и зачувување на автохтоното наследство, со што Македонија добива уште една препознатлива раса во светското кинолошко семејство.