БЛИСКИОТ СИТОК МИРЕН ДВЕ НЕДЕЛИ – Безбедниот премин низ Ормускиот теснец ја руши цената на нафта

Цената на нафтата „Брент“ денес падна за речиси 15% по постигнатиот договор за прекин на огнот на Блискиот Исток и сега барел се тргува за 94 долари. Иако тоа е значително намалување од претходните 120 долари за барел, сепак цената е околу 30% повисока отколку пред почетокот на конфликтот на 28 февруари.

На цената влијаеше затворањето на Ормускиот теснец, што сериозно го наруши снабдувањето од Блискиот Исток.

Цените на нафтата паднаа откако претседателот Доналд Трамп се согласи да ги суспендира нападите врз Иран за две недели, ако Техеран дозволи безбеден премин низ Ормускиот теснец.

• WTI нафта падна за повеќе од 15%, достигнувајќи 96,6 долари за барел.
• Брент нафта загуби над 14%, тргувајќи се на 93,9 долари за барел.

Трамп истакна дека двонеделниот прекин на огнот зависи од целосно, итно и безбедно отворање на Ормускиот теснец од страна на Иран. Тој додаде дека добил 10-точков предлог од Иран како основа за преговори.

Иранскиот министер за надворешни работи, Сејед Абас Арагчи, потврди дека Техеран ќе дозволи безбеден премин низ теснецот за време на прекинот на огнот, со координација со вооружените сили и почитување на техничките ограничувања.

Прекин на огнот беше постигнат помалку од два часа пред рокот на Трамп за отворање на теснецот. Тој претходно се закануваше со напади врз мостови и електрани, а неговата реторика вклучуваше и закани за уништување на цивилизацијата во Иран.

Трамп се согласи на прекинот по разговорите со пакистанскиот премиер Шехбаз Шариф, кој побара одложување на рокот за продолжување на преговорите и повторно отворање на теснецот како гест на добра волја.

Нападите на Иран врз комерцијални бродови претходно предизвикаа намалување на извозот на нафта преку теснецот, што беше најголемото прекинување на снабдувањето во историјата. Околу 20% од глобалните залихи на нафта поминуваат низ теснецот, кој го поврзува Персискиот залив со глобалните пазари.

За време на конфликтот, цените на суровата нафта, горивата и бензинот значително се зголемија, а експертите предупредија дека недостигот на гориво би можел да има глобални последици ако теснецот не се отвори целосно.